Tuesday, December 25, 2018

അപ്പക്കടവ്‌

ചൊവ്വക്കു  നിന്ന്   ചക്കരക്കൽ  വരെ ദൂരം ഏറെ ആയിരുന്നില്ലെങ്കിലും ,താഴെ ചൊവ്വ നിന്നും കാപ്പാട് വഴി ഉള്ള ബസ് യാത്ര ഏറെ നേരം തന്നെ എടുത്തിരുന്നു.  ഫൈസലിന്റെ പീടികയിൽ നിന്ന് വാങ്ങിയ പോളോ മുട്ടായിയും കീശയിലിട്ട്  ആ മുക്കാമണിക്കൂർ യാത്ര ഒരു തീരാ യാത്ര തന്നെ ആയിരുന്നു.
അപ്പക്കടവിൽ ബസ് ഇറങ്ങി അമ്മാളു ഏടത്തിയുടെ പറമ്പിലൂടെ പാമ്പിനെ പേടിച്ച്    ന ടക്കുമ്പോളും,അടുത്ത രണ്ടു ദിവസത്തെ സ്‌നേഹം മാത്രം ആയിരുന്നു മനസ്സിൽ. പുളിയും മുളകും ചാലിച്ച കഞ്ഞിയും, കശുമാവിന്റെ കറയും ,ഉപ്പിലിട്ട മാങ്ങയുടെയും രുചിയേക്കാൾ വലുതായി വേറെ ഒന്നും മനസ്സിലുണ്ടായിരുന്നില്ല. ജിയോസ്‌ലോവയും ജലവാസുലേഖയും ഉറക്കം കളഞ്ഞ രാത്രികളും, കുമാർ സാനുവും,ഉദിത് നാരായണും,ജൻഖാർ ബീറ്റസും മനസ്സു നിറച്ച പകലുകളും. ലോകം മുഴുവൻ കറങ്ങിയിട്ടും എവിടെയും കാണാത്ത രുചിയുള്ള തണുത്ത വെള്ളവും ,ടോം ആൻഡ് ജെറി രാവും പകലും ഓടി നടന്ന അകത്തളവും ഇനി വരില്ല.
ഗ്ലെൻ ലീവെറ്റിന്റെ ലഹരിയിൽ കണ്ണ് നിറഞ്ഞതു ഞാൻ അറിഞ്ഞില്ല. വർഷങ്ങൾ ഏറെ ആയി എന്ന് തിരിച്ചറിയുന്നെങ്കിലും ദൂരം ഏറെ യാത്ര ചെയ്തു എന്ന് തിരിച്ചറിയുന്നത് ഏറെ കാലത്തിനു ശേഷം ഇന്നായിരുന്നു. നേടിയത്  എന്ത് എന്നറിയില്ല,എന്നാൽ കൈ വിട്ടു പോയതെന്തൊക്കെ എന്ന് വളരെ അവ്യക്‌തമായ് മനസ്സിൽ പാഞ്ഞു മറയുന്നു. ഒരു പക്ഷെ ,സന്ധ്യയ്ക്ക് കാക്ക കൂട്ടം കൂവി മറയുന്ന നേരത്ത് നമുക്ക് നിഷ്കളങ്കമായി യക്ഷി കഥകൾ പറഞ്ഞു കൊണ്ട് ഇന്നും ഇരിക്കാമായിരുന്നു?

Monday, August 13, 2018

മഴ

കലിതുള്ളി പെയ്ത  മഴയെ ശപിച്ചൊരാ രാത്രി എനിക്കിന്നും ഓർമയുണ്ട്
ഓടിട്ട വീടിന്റെ വാർപ്പുള്ള മൂലയിൽ പേടിച്ചിരുന്നതും ഓർമയുണ്ട്
കാറ്റിൽ ഉലയുന്ന ഉപ്പില വീഴാതിരിക്കുവാൻ പ്രാര്ഥിച്ചതോർമയുണ്ട്
കലിതുള്ളി പെയ്ത മഴയെ ശപിച്ചൊരാ രാത്രി എനിക്കിന്നും ഓർമയുണ്ട്.

ശീപോതി പച്ചകൾ ചാലിച്ച കൂറ്റൻ മതിലുകൾ എനിക്കിന്നും ഓർമയുണ്ട്
മലവെള്ള പാച്ചലിൽ വീഴാതെ ഇടവഴി കയറിയതും എനിക്കോര്മയുണ്ട്
ഇടവഴി തോറും ചിരിക്കാതെ കൂർപ്പിച്ച  മുഖചിത്രങ്ങൾ എനിക്കോര്മയുണ്ട്
ശീപോതി പച്ചകൾ ചാലിച്ച കൂറ്റൻ മതിലുകൾ എനിക്കിന്നും ഓർമയുണ്ട്

മഴയത്തു ചെളിപുരണ്ടൊട്ടിയ പള്ളിക്കൂടം എനിക്കിന്നും ഓർമയുണ്ട്
മോട്ടിച്ച വെള്ളിക്കു വാങ്ങിയ ബോണ്ടയുടെ ചൂടെന്റെ  ചുണ്ടിലിന്നേറെയുണ്ട്
ചോരുന്ന മച്ചിൽ നിന്നുറ്റുന്ന പാട്ടിന്റെ ഈണം എനിക്കിന്നുമോർമയുണ്ട്
മഴയത്തു ചെളിപുരണ്ടൊട്ടിയ പള്ളിക്കൂടം എനിക്കിന്നും ഓർമയുണ്ട്

കലിതുള്ളി പെയ്ത  മഴയെ ശപിച്ചൊരാ രാത്രി എനിക്കിന്നും ഓർമയുണ്ട്
ഓടിട്ട വീടിന്റെ വാർപ്പുള്ള മൂലയിൽ പേടിച്ചിരുന്നതും ഓർമയുണ്ട്
കാറ്റിൽ ഉലയുന്ന ഉപ്പില വീഴാതിരിക്കുവാൻ പ്രാര്ഥിച്ചതോർമയുണ്ട്
കലിതുള്ളി പെയ്ത മഴയെ ശപിച്ചൊരാ രാത്രി എനിക്കിന്നും ഓർമയുണ്ട്.